E telē se malosiaga e fia faailoa ai le manaomia o le sui o lau amio.
O lenei itulau o loo faamatalaina ai auala e mafai ona matou fesoasoani atu ai ia te oe i lou agai atu ia avea oe ma tamāloa e sili atu, o se pa’aga, tamā po o le avea o oe o se sui o le aiga.
Fesili oe ia te oe
- Pe sa ou faataiō ea pe ‘e’ē i se tagata o le aiga?
- Pe sa ou fasia ea, pō, kiki, tulei pe una’i se tagata o le aiga – pe faamata’u i ai?
- Pe sa ou vala’auina ea i ni igoa leaga pe lēmafaufau se isi o le aiga? O a’u ea e malosi lo’u faifai ia i latou?
- Pe sa ou taofia ea la’u pa’aga mai le fa’aaluina o tupe mo lo latou lava fa’aaogaina?
- Pe sa ou faafefeina ea se tagata o le aiga?
- Pe sa ou togia ea se mea i luma o se tagata o le aiga, pe togi foi se mea aga’i i se tagata o le aiga, e pei o se ipu malamalama, se nofoa po o se remote o le tv?
- Pe sa ou faamalosia ea la’u pa’aga ina ia faia se gaioiga tau feusuaiga e le’i manao i ai?
- Pe sa ou taumafai ea ina ia taofia la’u pa’aga mai le faia o se mea o loo mana’o e fai? (mo se faataitaiga, alu e tafao ma uo, mauaina o se galuega, faia o ni nai a’oa’oga)
- Pe sa ou faamata’uina ina ia faauma le mafutaga ma la’u pa’aga LGBTIQA+?
Afai ua e tali ioe mai i se tasi pe sili atu o nei fesili, e mafai ona fesoasoani atu le matou auaunaga o i lalo.
Auaunaga o Faasinomaga mo Tamāloloa (Men’s Referral Service)– 1300 766 491
O loo avanoa 24 itula, 365 aso o le tausaga
O le Auaunaga o Faasinomaga mo Tamāloloa (MRS) e mafai ona tuuina atu ia te oe fautuaga ma faamatalaga e uiga i polokalame faatatau i suiga o amioga, polokalame faamātua, polokalame i le inu ‘ava ma isi fuala’au faasāina, lagolagosua faalesoifua maloloina ma auaunaga tau fale i lou pitonuu.
O le auaunaga e avanoa mo le 24 itula, fitu aso o le vaiaso, i le tausaga atoa – o le mea la lea o loo avanoa fesoasoani i soo se taimi e te manaomia ai.
O ai e lagolago e le Auaunaga o Faasinomaga mo Tamāloloa?
- O tamāloloa sa amio pe o loo amio faasauā ina ia suia a latou amio.
- O tagata o le aiga ua afaina i amio faasauā a se tamāloa.
- O uo, aiga po o uo faigaluega atonu o loo o latou fa’aaogaina sauaga, po o le aofia i vevesi faaleaiga ma sauaga i totonu o aiga, ma ua manana’o ina ia malamalama pe faapefea ona lagolagoina i latou.
- O le au polofesa o loo manana’o ina ia lagolago i se tagata o loo aofia po o ui i ni sauaga.
Pe a e vala’au i le Auaunaga o Faasinomaga mo Tamāloloa:
- E mafai lava ona lē iloa oe e se isi
- E faalogo i latou ia te oe ma amanaia oe
- O le a e mauaina ni faamatalaga e uiga i auaunaga faalotoifale e mafai ona fesoasoani ai ia te oe i le faia o le isi laasaga agai i le suia o lau amio.
A fia maua lea lagolagosua vala’au le 1300 766 491. E mafai ona e fa’aaogaina e lē totogia Auaunaga Faaliliu ma Faamatala-upu (TIS National) po o le matou webchat e fesoasoani ia te oe e talanoa ai i le auaunaga.
Brief Intervention Service ( Auaunaga mo sina taimi puupuu)
O le auaunaga,Brief Intervention Service (BIS) o se polokalame faufautua i luga o telefoni a le atunuu atoa, e mafai ona fesoasoani ia te oe pe afai o loo e faatali ina ia e mauaina se polokalame i le suia o amioga a tamāloloa. E mafai foi ona fesoasoani pe afai e le o avanoa se polokalame i le mea o loo e nofo ai, pe afai foi e te lē tautala Igilisi.
O le Brief Intervention Service o se polokalame lagolagosua i luga o le telefoni mo se taimi pu’upu’u ma e faia mo ni nai lesona. O le polokalame e mafai ona fesoasoani ia te oe ina ia:
- malamalama i lau amio
- sailiili pe faapefea ona a’oa’oina oe ina ia e tauaveina tiute fai mo lau amio
- a’oa’oina nisi auala fou ina ia saogalemū ma maloloina mafutaga ma atia’e aiga saogalemū.
Afai o loo e vaavaai ina ia maua le Auaunaga lea o le Brief Intervention Service, o le a manaomia oe ina ia vala’au muamua le Auaunaga o Faasinomaga mo Tamāloloa i le 1300 766 491. O se tagata faufautua o le a faalogo i lau faamatalaga ma fesoasoani ia te oe ia e maua le Brief Intervention Service).
E mafai foi ona e fa’aaogaina e lē totogia Translating and Interpreting Service (TIS National) po o le matou webchat e fesoasoani ia te oe e talanoa ai ma le auaunaga.
O lou tulaga faalilolilo ma le leiloa e se isi
O le Auaunaga o Faasinomaga mo Tamāloloa ma le Auaunaga Brief Intervention Service, o loo faatautaia e le No To Violence (Leai i Sauaga)(NTV). O le No to Violence o loo naunauta’i ina ia tuuina atu se auaunaga lelei ma lagolago ai aiā tatau a tagata uma e mauaina ma fa’aaoga a matou auaunaga.
I lalo o le Privacy Act 1988 (Cth), o le No To Violence e manaomia ina ia tuuina atu ia te oe faamatalaga pe o le a faapefea ona o matou fa’aaogaina ou faamatalaga patino. O ou faamatalaga o le a teuina faalilolilo ma leiloa e se isi se’i vagana ai ua i ai se popolega mo lou saogalemū po o le saogalemū o isi, po o le iai ia i matou o se mea e manaomia faaletulafono ina ia faasoa ai lea faamatalaga.
Pe a e faafesootai mai matou, o le a fesiligia oe pe e te tuuina mai se faatagana mo ou faamatalaga ina ia fa’aaogā ina ia mafai ai ona matou fesoasoani ia te oe. O faamatalaga lautele e uiga i tagata e fia mauaina a matou auaunaga atonu e fa’aaogā mo suesuega ma lipotia – mo se faataitaiga, le aofaiga o tagata e vala’au mai i setete taitasi po o teritori. O lau vala’au mai o le a faamaumauina ma atonu e fa’aaogā mo le lelei ma le faamoemoe i le a’oa’oina.
Mo nisi faamatalaga e uiga i au aiā tatau ma tiute fai ma ina ia faitauina le matou tuutuuga o tulaga faalilolilo faamolemole asiasi ane i le https://ntv.org.au/about-us/privacy/. E mafai foi ona e mauaina ni faamatalaga e uiga i auala e aumai ai sau tala e tali mai ai pe fai se faaseā.
Pe faapefea ona mauaina Auaunaga Faaliliu ma Faamatala-upu (TIS National)
O le Auaunaga Faaliliu ma Faamatala-upu (TIS National) o se auaunaga e lē totogia, e mafai ona fesoasoani ia te oe pe afai e te lē tautala Igilisi ma mana’o ina ia talanoa ma le Auaunaga o Faasinomaga mo Tamāloloa.
A fia fa’aaoga le auaunaga Faaliliu ma Faamatala-upu a le atunuu:
- vili le 131 450 i lau telefoni
- faailoa ane i le tali telefoni le gagana e te manaomia
- pe afai e te manao i ai, filifili se itupā e te manao i ai mo lau faamatala-upu (e faatatau i le avanoa)
O le a fesootai atu oe e le tali telefoni i se faamatala-upu e tautala i lau gagana, ina ia fesoasoani ia te oe e talanoa ai i le Auaunaga o Faasinomaga mo Tamāloloa.
Afai e te mafaufau atu faapea o lau faatalanoaga o le a umi atu ma le 30 minute, faamolemole faailoa i le faamatala-upu ina ia mafai ona latou faatulagaina se taimi atofaina e umi atu.
Faatalanoaga i luga o upega tafa’ilagi
E mafai ona e mauaina le matou faatalanoaga i luga o upega tafailagi i le Men’s Referral Service webchat pe afai e te manao e talanoa i se faufautua e fa’aaogā ai le pepa faatumu i luga o le initaneti.
O le taimi lava e te kiliki ai i luga o le link, o le a otomeki ona matala ane le pepa faatumu o le webchat i luga o le itulau upega tafa’ilagi. Na o le tuu lava i ai o ou faamatalaga ma faatali mo se tali mai a le auaunaga.
Faamolemole ia utagia mai o le matou webchat o loo maua i le na o le Igilisi. Afai e lelei lau faitau ma tusitusi i le Igilisi, atonu e te iloaina ai o se filifiliga talafeagai lea.
O lenei itulau upega tafa’ilagi ma auaunaga o loo lisiina iinei o loo faatupeina e le Australian Government Department of Social Services.
