یہ ماننا بڑے حوصلے کی بات ہے کہ ہمیں اپنا طرز عمل بدلنے کی ضرورت ہے۔

اس صفحے پر بتایا جا رہا ہے کہ ہم آپ کو بہترین مرد، بہترین پارٹنر، بہترین باپ یا بہترین فیملی ممبر بننے کے لیے کیسے مدد دے سکتے ہیں۔ 

خود سے پوچھیں:

• کیا میں کبھی اپنے گھر کے کسی فرد پر چیخا یا چلّایا ہوں؟
• کیا میں نے کبھی اپنے گھر کے کسی فرد پر ہاتھ اٹھایا ہے، تھپڑ مارا ہے یا دھکا دیا ہے – یا ایسا کرنے کی دھمکی دی ہے؟
• کیا میں نے کبھی اپنے گھر کے کسی فرد کو کسی برے نام سے یا بدتمیزی سے بلایا ہے؟ کیا میں مسلسل ان پر تنقید ک
• کیا میں نے کبھی اپنے ازدواجی ساتھی کو اس کی مرضی سے پیسے خرچ کرنے سے روکا ہے؟

• کیا میں نے کبھی اپنے گھر کے کسی فرد کو خوفزدہ کیا ہے؟
• کیا میں نے کبھی اپنے گھر کے کسی فرد کے سامنے یا اس کے اوپر کوئی چیز پھینکی ہے جیسے گلاس، کرسی یا ٹی وی کا ریموٹ؟
• کیا میں نے کبھی اپنے ازدواجی ساتھی پر سیکس کی کوئی ایسی حرکت کرنے کے لیے دباؤ ڈالا ہے جو وہ نہیں کرنا چاہتا تھا؟
• کیا میں نے کبھی اپنے ازدواجی ساتھی کو اس کی مرضی کا کوئی کام کرنے سے روکنے کی کوشش کی ہے؟ (جیسے دوستوں کے ساتھ باہر جانا، ملازمت کرنا، کوئی تعلیم حاصل کرنا)
• کیا میں نے کبھی اپنے LGBTIQA+ پارٹنر کو دھمکی دی ہے کہ میں اس کے متعلق دوسروں کو بتاؤں گا؟

اگر آپ نے ان میں سے ایک سے زیادہ سوال کا جواب ہاں میں دیا ہے تو ہماری مندرجہ ذیل سروسز آپ کی مدد کر سکتی ہیں۔

Men’s Referral Service – 1300 766 491

سال کے 365 دن، 24 گھنٹے دستیاب

Men’s Referral Service (MRS) آپ کو آپ کے علاقے میں کاؤنسلنگ (ماہرانہ رہنمائی) اور طرز عمل کو بدلنے کے پروگراموں، بچوں کی پرورش کے پروگراموں، الکحل اور دوسری منشّیات کے لیے پروگراموں، صحت کے لیے مدد اور رہائش کے لیے سروسز کے متعلق معلومات دے سکتی ہے۔

یہ سروس سال بھر، ہفتے کے ساتوں دن، 24 گھنٹے دستیاب ہے – لہذا جب بھی آپ کو ضرورت ہو، آپ مدد لے سکتے ہیں۔

Men’s Referral Service سے کن لوگوں کو فائدہ ہوتا ہے؟

• وہ مرد جو ماضی میں بدسلوکی کرتے رہے ہیں یا ابھی بدسلوکی کر رہے ہیں اور اپنا طرز عمل بدلنا چاہتے ہیں۔
• کسی مرد کی بدسلوکی سے متاثر ہونے والے افرادِ خاندان۔
• تشدّد استعمال کرنے والوں یا گھریلو اور عائلی تشدّد سے دوچار لوگوں کے دوست، گھر والے یا ساتھی کارکن جو ان کی مدد کرنے کے طریقے سمجھنا چاہتے ہوں۔
• تشدّد استعمال کرنے والے یا تشدّد سے دوچار کلائنٹس کی مدد کے خواہشمند پیشہ ور افراد۔

جب آپ Men’s Referral Service کو کال کریں تو:

• آپ اپنا نام خفیہ رکھ سکتے ہیں
• آپ کی بات سنی جاتی ہے اور آپ کے ساتھ احترام کا سلوک ہوتا ہے
• آپ کو ان مقامی سروسز کے متعلق معلومات ملیں گی جو آپ کو اپنا طرز عمل بدلنے کے لیے اگلا قدم اٹھانے میں مدد دے سکتی ہیں۔

مدد لینے کے لیے 1300 766 491 پر کال کریں۔ آپ اس سروس سے بات کرنے میں مدد کے لیے ٹرانسلیٹنگ اینڈ انٹرپریٹنگ سروس (TIS National) کو بھی کال کر سکتے ہیں یا ہماری ویب چیٹ  استعمال کر سکتے ہیں۔

بریف انٹروینشن سروس

بریف انٹروینشن سروس(BIS)  سے مراد ایک نیشنل ٹیلیفون کاؤنسلنگ پروگرام ہے جو ان لوگوں کو مدد دے سکتا ہے جو مردوں کے طرز عمل میں تبدیلی کے کسی پروگرام میں باری آنے کے منتظر ہوں۔ اگر آپ کے علاقے میں ایسا کوئی پروگرام نہ ہو یا اگر آپ انگلش نہ بولتے ہوں تو بھی یہ سروس مدد دے سکتی ہے۔

بریف انٹروینشن سروس مختصر مدت کے لیے ٹیلیفون پر مدد کا پروگرام ہے جس کے کئی سیشن ہوتے ہیں۔ یہ پروگرام آپ کو:

• اپنا طرز عمل سمجھنے میں مدد دے سکتا ہے
• یہ جاننے میں مدد دے سکتا ہے کہ آپ اپنے طرز عمل کی ذمہ داری قبول کرنا کیسے سیکھ سکتے ہیں
• محفوظ اور صحتمندانہ رشتے بنانے اور  گھرانوں کو محفوظ رکھنے کے نئے طریقے سیکھنے میں مدد دے سکتا ہے۔

اگر آپ بریف انٹروینشن سروس سے مدد لینا چاہتے ہوں تو آپ کو پہلے 1300 766 491 پر Men’s Referral Service  کو کال کرنی ہو گی۔ ایک کاؤنسلر آپ کی داستان سنے گا اور پھر آپ کا رابطہ بریف انٹروینشن سروس سے کروائے گا۔

آپ اس سروس سے بات کرنے میں مدد کے لیے ٹرانسلیٹنگ اینڈ انٹرپریٹنگ سروس (TIS National) کو بھی کال کر سکتے ہیں یا ہماری ویب چیٹ  استعمال کر سکتے ہیں۔

آپ کی پرائیویسی اور معاملات کی رازداری

Men’s Referral Service اور بریف انٹروینشن سروس کو No to Violence (NTV) نامی تنظیم چلاتی ہے۔ No to Violence ان تمام لوگوں کو معیاری سروس دینے اور ان کے حقوق روا رکھنے کا عزم رکھتی ہے جو ہم سے رابطہ کرتے ہیں اور ہماری سروسز استعمال کرتے ہیں۔

پرائیویسی ایکٹ 1988 (کامن ویلتھ) کے تحت No to Violence آپ کو یہ معلومات دینے کی پابند ہے کہ ہم آپ کی ذاتی تفصیلات کو کیسے استعمال کریں گے۔ آپ کی تفصیلات کو خفیہ اور بصیغۂ راز رکھا جائے گا، سوائے اس کے کہ آپ کی خیریت یا کسی اور شخص کی خیریت کے متعلق تشویش پائی جائے یا قانون ہمیں یہ معلومات آگے دینے کا پابند کرتا ہو۔

جب آپ ہم سے رابطہ کریں گے تو آپ سے پوچھا جائے گا کہ کیا آپ ہمیں اپنی ذاتی تفصیلات کو استعمال کرنے کی اجازت دیتے ہیں تاکہ ہم آپ کی مدد کر سکیں۔  ہماری خدمات لینے والے لوگوں کے متعلق عمومی معلومات کو تحقیق اور رپورٹنگ کے لیے استعمال کیا جا سکتا ہے – جیسے ہر سٹیٹ یا ٹیریٹری سے کال کرنے والوں کی تعداد۔  آپ کی کال ریکارڈ کی جائے گی اور اس ریکارڈنگ کو معیار چیک کرنے کی خاطر اور تربیت کے مقصد سے استعمال کیا جا سکتا ہے۔

اپنے حقوق اور ذمہ داریوں کے متعلق مزید معلومات لینے اور ہماری پرائیویسی پالیسی پڑھنے کے لیے https://ntv.org.au/about-us/privacy/ پر جائیں۔ آپ اپنی رائے دینے یا شکایت کرنے کے طریقے کے متعلق معلومات بھی دیکھ سکتے ہیں۔

ٹرانسلیٹنگ اینڈ انٹرپریٹنگ سروس (TIS National) کو کیسے استعمال کیا جا سکتا ہے

ٹرانسلیٹنگ اینڈ انٹرپریٹنگ سروس (TIS National) ایک مفت سروس ہے جو انگلش نہ بولنے والے ان لوگوں کی مدد کرتی ہے جو Men’s Referral Service سے بات کرنا چاہتے ہوں۔

TIS National کی سروس کو استعمال کرنے کے لیے:

• 131 450 پر فون کریں
• آپریٹر کو اپنی مطلوبہ زبان بتائیں
• یہ بتائیں کہ کیا آپ مرد انٹرپریٹر یا خاتون انٹرپریٹر لینا چاہتے ہیں (اگر دونوں اصناف کے انٹرپریٹر موجود ہوں تو)

آپریٹر آپ کا رابطہ آپ کی زبان بولنے والے انٹرپریٹر سے کروائے گا تاکہ وہ Men’s Referral Service کے ساتھ بات چیت میں آپ کی مدد کرے۔

اگر آپ کے خیال میں بات چیت 30 منٹ سے زیادہ لمبی ہو جائے گی تو براہ مہربانی انٹرپریٹنگ سروس کو پہلے بتا دیں تاکہ آپ کے لیے زیادہ وقت مخصوص کیا جائے۔  

ویب چیٹ 

اگر آپ کاؤنسلر سے آن لائن فارم کے ذریعے بات کرنا بہتر سمجھتے ہیں تو آپ ہماری Men’s Referral Service ویب چیٹ  استعمال کر سکتے ہیں۔

آپ کے  link پر کلک کرنے سے ویب پیج پر ویب چیٹ فارم خود بخود کھل جائے گا۔ بس اپنی تفصیلات اینٹر کریں اور سروس کی طرف سے رابطے کا انتظار کریں۔

براہ مہربانی ذہن میں رکھیں کہ ہماری ویب چیٹ صرف انگلش میں ہوتی ہے۔ اگر آپ اعتماد سے انگلش پڑھ اور لکھ سکتے ہیں تو آپ کو غالباً ویب چیٹ استعمال کرنا مناسب لگے گا۔

اس ترجمہ شدہ ویب پیج اور یہاں مذکور سروسز کو آسٹریلین گورنمنٹ ڈیپارٹمنٹ آف سوشل سروسز سے فنڈنگ ملتی ہے۔